望一望手錶，吞一吞口水，仲有十幾分鐘，「佢」就會出現。無見咁耐，心情好緊張，甚至有種尷尬嘅感覺，但內心卻想見到佢，好想見下佢，好想知佢最近點。
「阿亮，做咩係咁望個錶? 你趕時間咩?」阿明問。
「唔係呀，想知Vivian幾時到之嘛，我好想快啲食雞煲呀!凍死我啦!」
「都唔知係咪......丫! Vivian黎啦!可以行得!」阿明指著前方，嚇得我心跳加速，整個人都發軟，慢慢將視線轉向前方，見到阿A充滿笑容地一路行一路同我地揮手。
大學一年級，阿明生日去左遊船河，而Vivian就係當時阿明嘅朋友，大家同年紀好快就傾得埋。去得船河當然落水玩下啦，點知Vivian話佢唔識游水，企係船淆淆地咁，我就行埋去同佢講:「如果有咩事我一定會救你喎，放心落去玩啦。」
雖然Vivian最後都無落到水，但我就一直係船邊同佢傾計，直至返到屋企，都忍唔住係Wechat繼續傾計，唔知點解我地幾夾傾，加上佢回應我嘅速度接近秒速，我好鐘意咁爽快嘅人，咁先係似傾計架嘛。後黎我地經常出街，而且佢幫人補習改唔哂啲功課，我都肯通頂同佢一齊改，之後佢請我食放題，個餐飯我地食得好開心，電視上仲播緊梁振英同唐英年嘅辯論，當聽到唐唐講句:「你呃人!」我地就笑到肚痛。
久而久之，我地開始熟絡，圍內身邊嘅人都留意到。有一次阿明問我係咪同Vivian有路，我反而R哂頭話:「每次都係佢搵我，街都係佢約我出去，我點會對佢有興趣?」
「嘩!日日係咁傾，又出埋街，唔好話比我聽無野喎!」
「我只係覺得人地約得我，唔係好意思拒絕人，咪同佢出下街囉，同埋......同佢一齊真係幾舒服，唔洗步步為營咁。」我將心底話講出黎。
「屌!咁咪姐係鐘意囉!」
「唔係.....真係唔係!」我真心覺得自己唔係鐘意佢，只係同佢一齊好舒服，如果要講到拍拖，我覺得自己仲未克服到心理恐懼。個晚我地約左成班人出黎倒數，比阿明咁問一問，令我對Vivian有一種討厭嘅感覺，覺得佢做任何野我都睇唔順眼。
「阿亮，我帶左部即影即有相機，不如我地影返張!」Vivain笑住口問。
嗰刻我完全理解唔到點解要影相，開始黑起塊面對佢，最後成班朋友見到佢帶左部相機先出聲話大合照，當影個陣，Vivain行埋黎，而我即刻走開，總之唔想企佢格離影，但佢堅持，最後係我身旁影左張相，但佢已經怕左我，因為我真係黑起塊面好差咁佢。
有一次同佢出街睇戲，Vivian已經撟住我隻手，我本身都好開心，但我又唔敢捉實佢，我內心好怕如果我捉實左佢，一陣正式開始左，我怕到時拍拖時對佢唔夠好，而佢最後離開我，我會好傷心。曾經聽高登個孔明講句要愛自己，我就係太過愛自己，變得好自私，我享受依段關係，但我怕失去依段關係，攪到自己好似收左條女做兵咁。我太計較自己付出，但我珍惜佢對我嘅付出。
有一日Vivian忍唔住同我表白，我只係扮傻仔咁回應:「嗯? 你頭先講咩話?」
Vivian搖搖頭笑笑口話:「都係無野。」但我留意到當佢講完後，笑容下仍然流露出失望嘅表情。我好清楚佢好鐘意我，但我真係怕，我只係希望佢可以等我，直至我克服心入面嘅恐懼。
有一年佢去外國旅行，個日我去左送佢機，佢好開心咁攬住我，當時全世界都睇住，但我無尷尬，只有害怕，我當時無攬實佢，我怕我唔係佢男朋友而咁做，佢會唔高興，最後我拍一拍背就算，後來都開始無搵大家。
直到上年畢業，佢突然出現係我門前，雖然佢把口就搵阿明影相，但我知道佢係想同我影相。嗰刻我因為畢業情緒高漲，心情好好，我主動搭佢膊頭影相，我留意到佢充滿笑容非常開心，依一張相就好似打破以往大家一直沉默嘅狀態，正式有個新開始。
年尾時侯，佢要去台灣過新年，我地又再一次送佢機，雖然佢係咁叫我唔洗去，但我仍然堅持。當我搭車去機埸時，我個心仲係好期待，但去到機埸後，我即刻變左個On9，我係到扮冷淡，完全漠視佢，點知佢又冷淡對我，走個陣就咁揮下手就閃人，同第一次對比，我有一種莫名奇妙嘅唔開心。
個陣我唔開心，心裡感受到Vivian開始離開我，唔捨得嘅心開始湧現，最後我忍唔住Whatsapp佢:「不如一齊。」
點知佢Whatsapp打左篇好長嘅文比我
「阿亮，琴晚睇完戲，我建議去食下午茶，你開頭話好，之後叫你決定，但你睇左個餐牌一陣後，最後話: 都係唔食，不如出去行下。當時我諗你到底想食下午茶定係唔想拒絕我? 一直以來，係我地相處之中，你都處於被動，從一開始識你，到食飯行街，你都無拒絕，但你都無講過話鐘意。真係架，我曾經真係好期待你任何方式嘅Reply，我地一齊過聖誕，新年倒數，生日，你嘅送機，接機......個陣我以為我地關係又進一步，點知最後咩都無發生，咁樣嘅日子至少1,2年吧? 我開始係到諗，到底係你想見我，定係唔好意思拒絕我? 最近我開始變，我唔記得鐘意左你嘅感覺，我等唔到你，我完全唔知你想點......希望你諗清楚自己想點，諗清楚你想要啲咩再搵我吧。」
個陣我一直都無回應，應該話我唔知回佢咩好，內心好矛盾，我知道自己鐘意佢，但我又怕，問過身邊好多人，雖然個個都要我去馬，又話Vivian係好女仔，又未拍過拖，作為男人好應該主動，畢竟Vivian背後做左好多野，而我一直都打唔開個心結。
今晚再一次見面，距離最後一個Msg已經兩個月，我已經諗清楚，我係鐘意佢，我好想見佢，今晚我就要表白，將我心意講比Vivian聽。
當我行到Vivian面前時，我真誠地講左句:「Hi，好耐無見。」
Vivian先望一望我，然後快速地回應:「Hi!」然後視線好快就轉向其他人，個種冷淡得不能再冷淡嘅眼神，係我從來未見過，我唔係係佢心目中好重要咩? 佢唔係等緊我咩? 以往我從來唔會主動叫佢，依家我主動左，佢唔係應該好開心咩?
「等左好耐呀? Sorry呀!我男朋友病左，我陪佢睇醫生所以遲左!」Vivian同我地說。
之後成班人開始起哄:「WOW! 終於出Pool啦!收埋食!拿!咪講住!拿拿淋去食雞煲慢慢講!」說罷，成班人就出發。
依一刻，我腦海好似倒帶咁，以往同Vivian一齊過嘅畫面通通浮現，如今知佢拍拖，內心唔好受，但唔知點解有一種解脫嘅感覺，我慢慢咁行去身旁嘅垃圾筒，係我書包拎左我手製嘅禮物同卡，之前一直想送比Vivian，仲癲到係佢附近行，諗住撞下佢之後送比佢，但最後都拖到今日，我諗依堆野再無任何意義，唯有掉左佢。
遠處傳來一起叫聲:「快撚啲行啦!成班等緊你呀阿亮!」
我慢慢行過去，腦海突然浮現出許志安首昨遲人。
" 昨日像得到遲來無去路，給你與某人在長夜共抱......."
PS: 加油啦"朋友" 唔好再係附近等啦，天氣咁凍好返屋企! Hurt下 煩下咪幾好，多份經歷，人生先無咁悶! 至少起碼有對像掛住! 撐你呀!
Search